幾個月前，我受訓嘅部門請左位英國教授黎教書，講到世界護理界嘅其中一個大勢，係出現護士診所 (Nurse-led Clinics）。
一堆有興趣嘅姑娘可以受訓，自己睇症、自己做檢查，再同電腦系統同醫生們交換返資訊。講到呢到，教授話「而家英國醫療系統除左簽同意書一類文書工作之外，基本上全電腦化，相信你地都係」，跟住觀眾席出現一輪冷笑。無錯！係香港大部份醫院，我地依然極著重紙筆墨硯。除左同意書，部門之間要會診、轉介、證明，要血庫攞血，要搵實驗室加驗約期，好多時係由實習醫生寫完信印出黎、甚或者係手寫填表，然後有請，閃電傳真機！我地實習好多時候日日就係到打信、印信、fax 信，你話香港真係談何創科。
全電腦化？
藥紙要印、申請要印、轉介要印，你估下一個病房一日會燒幾多疊白紙？病人 A 忽然要多隻必理痛、病人 B 女兒忽然想要多張轉介，背後發生嘅就係我地要撕爛原本嘅十幾張文件，再印十幾張。要印，就要電腦。頭先講過嘅所有工作全部都要電腦，而一個病房，通常都只得四五部，每日朝早醫生、姑娘、文員就要搶電腦用。用得個幾鐘，部電腦就會好似慢同死機。好多病人都抱怨，明明全病房都係醫生，點解出院文件要搞咁耐，原因就係咁。
上大人發揮佢嘅小宇宙，為病房添置我地叫做「牛」嘅可移動電腦、平板電腦，希望做嘢會快左。我地醫院空間寬敞，放部比人類高大嘅牛係到完全綽綽有餘。當然，天才唸嘢嘅方式唔係我地常人可以理解。呢啲「牛」同平板要靠 Wi-Fi，運作更慢，而且，佢係未必有連接到打印機。要印嘢，請儲存，再搵部機印返。可能真係快左，但又真係好低智能。某啲病房高級，打印機有連到去 Wi-Fi，但都要等你隻「牛」load 到、你 Wi-Fi load 到，先會印到。結果係，大家依然都係搶返個幾部電腦。
當一個系統本身唔掂，堅持 update 一個「行之有效嘅制度」就好似係一個三流餅底上面加埋啲忌廉朱古力士多啤梨，遲早冧。
咁當然就算餅底再靚，你放個保齡球上去，一樣等冧。
#DrWhoHK
圖：Google 'CMS 醫管局' 第一幅圖
Search